இஸ்ரேல் ஆக்கிரமிப்பு படைகள் காசா, லெபனானைத் தொடர்ந்து ஈரான் மீதும் தனது தாக்குதல்களை கட்டவிழ்ந்துவிட்டு வருகின்றன. காசா மற்றும் லெபனானில் இஸ்ரேல் ராணுவம் மனித உரிமை மீறல்களில் அப்பட்டமாக ஈடுபட்டு வருகிறது. இதனை அமெரிக்கா உள்ளிட்ட பல்வேறு உலக நாடுகளும் கண்டும், காணாதது போல் உள்ளன.

இந்நிலையில் இஸ்ரேலுக்கு பாடம் புகட்டும் வகையில் ஈரான் பதிலடி கொடுத்து வருகிறது. ஈரானின் இந்த தாக்குதல்களுக்கு ஆயுதம் உள்ளிட்ட உதவுகளை ஈராக் வழங்கி வருகிறது. ஏற்கனவே இஸ்ரேல் தன்னைச் சுற்றியுள்ள நாடுகளுடன் மோதல் போக்கை கடைபிடித்து வரும் நிலையில், தற்போது ஈரான் – ஈராக் அமைச்சர்களுக்குகிடையிலான சந்திப்பு மிகப்பெரிய இடியாக அமைந்துள்ளது.

ஈரானிய வெளியுறவு மந்திரி அப்பாஸ் அராக்சி மற்றும் ஈராக்கின் தேசிய பாதுகாப்பு ஆலோசகர் காசிம் அல்-அராஜி ஆகியோர் இன்று சந்தித்து பேசியுள்ளனர். இந்த சந்திப்பின் போது, ஈரானின் பாதுகாப்பை மீறும் எந்த நடவடிக்கைக்கும் பாக்தாத் மற்றும் குர்திஸ்தான் பகுதிகளில் இருந்து பதிலடி கொடுக்கப்படும் என ஈராக்கின் தேசிய பாதுகாப்பு ஆலோசகர் காசிம் அல்-அராஜி உறுதியளித்துள்ளார்.

மேலும் இந்த சந்திப்பின் போது ஈராக்கின் பாதுகாப்பிற்காக ஈரானும், ஈரானின் பாதுகாப்பிற்காக ஈராக்கும் ஒன்றிணைந்து நிற்கும் என இருநாட்டு அமைச்சர்களும் உறுதி அளித்துள்ளனர். இது “இரண்டு நாடுகளும் வேறு, வேறு அல்ல… ஒன்றின் மேல் கைவைத்தால், மற்றொரு நாடு சும்மா இருக்காது” என இஸ்ரேலுக்கு விடுக்கப்பட்ட வெளிப்படையான எச்சரிக்கையாகவே பார்க்கப்படுகிறது.

இந்த பேச்சுவார்த்தையின் போது காசா மற்றும் லெபனான் மீது இஸ்ரேல் ஆக்கிரமிப்பு படை நடத்தி வரும் மோசமான போரால் மக்கள் அனுபவித்து வரும் இன்னல்களை முடிவுக்கு கொண்டு வருவது குறித்தும், இஸ்லாமிய நாடுகளை ஒன்றிணைப்பது தொடர்பாக ஏற்பட்டுள்ள முன்னேற்றங்கள் குறித்தும் விவாதிக்கப்பட்டுள்ளதாக தகவல்கள் வெளியாகியுள்ளன.